Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Historia

Hastapenak

San Joan Jainkoarenaren Ospitale Ordena 1898az geroztik dago Euskadin (Arrasateko Santa Ageda ospitale psikiatrikoa), baina Gipuzkoan egiten zuen ospitale-lana hedatzea erabaki, eta ospitale-zentro bat ireki zuen hiriburuan, “Haur elbarri behartsuei” laguntzeko berariazko xedearekin. 1952ko abuztuaren 24an inauguratu zen.

Nabarmentzekoa da Gipuzkoako herritar askok, modu altruistan, beren denbora librearen parte bat eskaini zutela eta dohaintzak eman zituztela ospitaleratutako umeen bizimodua animatzeko. Hona hemen garai hartako egunkari batek esandakoaren transkripzioa: “….meritu oneko San Joan Jainkoarenaren Ospitale Ordenak ofizialki inauguratu du Errondoko gainean, Juanistegi baserria eta Errondo-Txiki etxea zegoen lekuan, Gipuzkoako haur elbarri pobreentzako San Joan Jainkoarenaren Klinika Ortopediko zoragarria, diputazio probintzialaren, Donostiako Udalaren, probintziako udalerrien eta Gipuzkoako enpresa eta partikularren ekarpen ekonomiko eskuzabalarekin eta aipatutako ordenaren beraren baliabideekin, zeinak ez baitu ahaleginik ez sakrifiziorik xuhurtu, benetako kristau-karitatearen espirituaz bultzatuta, Gipuzkoari horrelako ongintzako zentro bat emateko, zeinaren beharra sumatzen baitzen”..

25 urtez eman zuen osasun- eta gizarte-arreta, eta Gipuzkoako haur askoren beharrak bete ziren urte haietan.

Jarraipena…

Zorionez, poliomielitisaren kontrako txertoa agertu eta masiboki jarri izanaren ondorioz, ia desagertu egin zen gaixotasun hori. Horren ondorioz, San Joan Jainkoarenaren Ospitale Ordenak, sortze-espirituari leial izan nahian, bere presentzia eta laguntza behar zuten osasun- eta gizarte-arloko beste esparru batzuk arakatu zituen, Gipuzkoan.

Hala, 1977an, zentroko instalazioak erabat aldatu eta gero, bigarren ibilbide bati ekin zion. Oraingoan, ospitale mediko-kirurgiko gisa. Zerbitzu berriak eskainiz hasi zen ospitalea:  hemodialisia (1978), Unitate Gerontologikoa (1993).

Ezaugarri horiei esker eta ospitalea osatzen zuten guztien ahaleginari esker, beste 25 urtez gipuzkoarrei laguntzen jarraitu zuen San Joan Jainkoarenaren ospitaleak.

Oraina eta etorkizuna…

2002an Ospitaleak 50 urte egin zituenean hain justu, Ospitale Ordenak lankidetza-hitzarmen bat sinatu zuen Eusko Jaurlaritzako Osasun Sailarekin. Haren bitartez, ospitalea erabat eraldatzea adostu zen egonaldi ertaineko ospitale psikiatriko gisa egokitzeko osasun mentalaren arloan laguntza emateko, hasiera batean 75 oherekin. Batez ere Donostialdeko eta haren mugakide diren eskualdeetako gaixoekin lan egiten du.

Egia esan, berritze-lanen ondoren, Ospitaleak primerako egitura arkitektonikoa zuen, eta ospitaleratzeaz haragoko zerbitzuak eskaintzeko gaitasuna bereganatu zuen.

2005eko martxoaren 1ean hasi zen lanean, eta lehenengo paziente ospitaleratuak Arrasateko Santa Agedako San Joan Jainkoarenaren ospitalekoak izan ziren.

2005eko martxoaren 19an inauguratu ziren instalazio berriak. Instalazio modernoak eta zituzten garapen-aukerak baliatuta, Ospitaleak administrazio publikoarekin batera lan egin nahi izan zuen Gipuzkoako Lurralde Historikoan asistentzia psikiatrikoa indartzeko, bere zerbitzu-zorroa hedatuz beharrezkoa zuten eta bideragarria zen eskualdeetara.

San Joan Jainkoarenaren Ospitale Ordena oso pozik dago Donostiako hirian jarraitu izan duelako, eta eskerrak ematen dizkie hori posible egin duten guztiei beren ahaleginagatik.